Cmvmc - Montes Paraños

A CMVMC de Paraños, pertence ao concello de Covelo, no Sur da provincia de Pontevedra. Un concello montañoso polo que camiña o curso alto do río Tea, afluente do Miño e encostado na ladeira Oeste das últimas elevacións da Dorsal Galega, pouco antes de morrer no pai Miño.

Datos básicos

A parroquia de Paraños, está situada ao Sur do Concello lindando co concello de Mondariz, nunha zona penichaira orientada ao SO, entre os 350 m de Rega das Bestas e A Lagoa e os 752 m de Seixos Albos. Está atravesada de Nordeste a Suroeste polo río Xabriña, afluente do Tea (ambos os dous incluídos na Rede Natura 2000, aínda que non totalmente).

É unha parroquia de escasos 200 habitantes que viviu básicamente, ata mediados do século XX, da agricultura e a gandería. Sufriu fortemente a emigración a América do Sur e Portugal, principalmente na primeira metade do século XX e, posteriormente a Europa (Suíza e Alemaña).Na segunda metade do século pasado moitas persoas ían diariamente a Vigo traballar na construción ou nas fábricas. Moitos rapaces estableceron a súa morada na grande urbe traballando no comercio. Hoxe en día a xente moza, ou non tan moza, marcha especialmente para vilas e cidades dos arredores, a pesares das boas vías de comunicación que existen (está a 30 minutos en coche dende Vigo e a 40 da cidade de Ourense).

Comunidade e monte veciñal

O monte veciñal en man común de Paraños foi clasificado como tal a favor dos VECIÑOS DE PARAÑOS, polo Xurado Provincial de Montes en data 4 de maio de 1979, inicialmente con 220 Ha. Na actualidade conta con 301 Ha. despois dun contencioso coa parroquia de Mouriscados (segundo sentenzas da Audiencia Provincial de Pontevedra de 25-05-2001 e Tribunal Superior de Xustiza de Galicia de 21-02-2002).

A Comunidade de Montes constituíuse en 1980 e en 2018 está formada por 60 comuneiros-as, aínda que sempre estivo por enriba dos cen. Agora hai veciños-as que non solicitan a alta como comuneiros-as, aínda que lles asista o dereito a selo.

Dende hai xa anos a Xunta Reitora non consegue completar os seus membros. Aínda que os Estatutos din que debe estar composta por sete membros, nos dous últimos mandatos só acadamos formar unha Xunta con cinco compoñentes (tres homes e dúas mulleres).

Practicamente dende os seus comezos a Comunidade é socia da Asociación Forestal de Galicia e da Organización Galega de Comunidades de Montes.

Xunto con outras comunidades forma parte da Mancomunidade de Montes da Paradanta.

O monte veciñal de Paraños está atravesado por dúas importantes infraestruturas viarias: as estradas N-120 e a N-559, que enlaza coa autovía A-52 e tamén pola liña eléctrica de A.T. As Cunchas-Vigo.